09.30.06
போட்டி - ஆலோசனைகள்: தெளிவுகள்
தேன்கூடு தமிழோவியம் இணைந்து நடத்தும் வலைப்பதிவுகளுக்கான மாதாந்திரப் போட்டியின் அட்டகாசமான வெற்றியைத் தரும் வாசகர்களுக்கும் இனிய வலைப்பதிவர்களுக்கும் நன்றிகள்!
இனி,
தொடர்ந்து ஏராளமான ஆலோசனைகள் வலை நண்பர்கள் அள்ளித்தந்த வண்ணம் இருக்கின்றனர். போட்டியின் வெற்றியில் உங்களுக்கு இருக்கும் ஆர்வத்திற்கு மிக்க நன்றி.
இந்த போட்டிகளின் மிக முக்கிய நோக்கங்களில் ஒன்று:
நல்ல எழுத்துக்களை வலைப்பதிவுகளில் ஊக்குவிப்பது, புதிய வலைப்பதிவர்களுக்கு தமிழில் எழுதும் ஆர்வத்தினை உருவாக்குவது.
தேன்கூடு.காம் - தமிழ் வலைப்பதிவுகளின் திரட்டி, தொகுப்பகம் மற்றும் வலைவாசல் என்ற முறையில் நல்ல எழுத்துக்களை வலைப்பதிவுகளில் ஊக்குவிப்பது எங்களின் முக்கிய நோக்கமாகக் கருதுகிறோம்.
ஒவ்வொரு முறையும் நாங்கள் குறிப்பிடுவது போல, வலைப்பதிவாளர்களின் திறமையை அவர்கள் பாணியில் அவர்கள் பதிவிலேயே வெளிப்படுத்துவதில் உள்ள சுவாரசி்யம் வேறெதிலும் இல்லை என்று நிச்சயம் நம்புகிறோம். ஆக்கங்களில் கூட, வலைப்பதிவுகளின் அனைத்து சாத்தியக்கூறுகளையும் எதிர்பார்க்கிறோம். அது பிளாஷ் மென்பொருளில் செய்யப்பட்டு பதியப்படுவதாக இருக்கலாம்; பாட் கேஸ்டிக் ஆக இருக்கலாம்; புகைப்படங்களாக இருக்கலாம்; வீடியோவாக இருக்கலாம்; அல்லது கவிதை கதை போன்ற அனைத்து படைப்புக்கூறுகளாகவும் இருக்கலாம். எதுவாக இருந்தாலும், போட்டிக்கான தலைப்பின் தொடர்புடையதாக இருக்க வேண்டும் என்பதே முக்கியம்.
பெயர் வெளியிடாமல், ஆக்கங்களை நாங்கள் பெற்றுக்கொண்டு பதிப்பிப்பது போன்ற முறைகள் இந்த நோக்கங்களுக்கு தடையாக இருக்கும் என்பதினை மனதில் கொள்ள வேண்டுகிறோம்.
போட்டியில் பங்கேற்பவர்களின் ஆக்கத்திற்கு உடனடியாக கிடைக்கும், பின்னூட்டங்கள்; விமர்சனங்கள் இவையே இங்கு போட்டியாளர்களுக்கு கிடைக்கும் உடனடி பரிசுகள் என்று கருதுகிறோம்.
வாக்கெடுப்பின் முறையிலுள்ள குறைகளைக் குறைக்கும் விதமாக, இந்த மாதத்தின் சில நேரங்களில் சோதனையில் இருந்த முறைகள் வரும் மாதப் போட்டியில் முழுமையாக இருக்கும். இது கள்ள வோட்டுகளின் எண்ணிக்கையை முற்றிலும் குறைக்ககூடும் என்று சொல்வதற்கில்லை. ஆனால் நிச்சயம் குறைக்கக்கூடும்.( உதா: செப்டம்பர் போட்டியின், கடைசி நாள் கடைசி சில மணித்துளிகளில் ஒரே கணிணியிலிருந்து மீண்டும் மீண்டும் வாக்கெடுப்பில் கலந்து கொண்டு போட்டியின் நோக்கத்தினை, எங்களின் முயற்சி மற்றும் உழைப்பினை, போட்டியாளர்களின் ஆர்வத்தினை வேடிக்கையாக்க முயற்சி செய்திட்ட சிலரின் முயற்சிகளைத் தவிர்க்கக் கூடும்.)
வரும் மாதங்களின் போட்டிகளில் வேறு சில மாற்றங்களும் உங்கள் ஆதரவுடன் செய்ய நினைத்திருக்கிறோம்!
புரிதலுடன் எங்களைத் தொடர்பு கொண்ட வலைஞர்களுக்கு எங்களின் மனமார்ந்த நன்றி. தொடர்ந்து, உங்களது கருத்துக்களை எங்களுக்கு அனுப்பி வையுங்கள்.
அன்புடன்,
தேன்கூடு நண்பர்கள் குழாம்.